*Qeyd: “Əmanətlərin sığortalanması haqqında” Qanunun 27.2-ci maddəsinə əsasən əmanətlər üzrə faizlər sığorta hadisəsinin baş verdiyi günə qədər hesablanmış məbləğdə ödənilir, bu şərtlə ki, kompensasiya bu Qanunun 26.1-ci maddəsində göstərilən məbləğdən (30 min manat) artıq olmasın. Əmanətlər üzrə faizlərin hesablanması və əmanətçi tərəfindən götürülmə müddəti bank tərəfindən müxtəlif formada müəyyən olunduğuna görə kompensasiya məbləği üzrə hesablanmış faizlər onlayn kalkulyatorda nəzərə alınmamışdır. Bu səbəblə “kompensasiya məbləği” bölümündə Əmanətçinin əsas məbləği qeyd edilir.
Kompensasiya hansı valyutalarda ödənilir?
Milli valyutada olan əmanətlərə - manatda. Həm milli, həm də xarici valyutada olan əmanətlər - bir əmanət kimi manatla. ABŞ dolları və avroda olan əmanətlərə - həmin valyutada. Digər valyutada olan əmanətlərə - sığorta hadisəsi baş verən günə Mərkəzi Bankın rəsmi məzənnəsinə əsasən çarpaz məzənnə ilə hesablanmış ABŞ dolları və ya avroda
Kompensasiyanın məbləği və faizi nə qədərdir?
02 mart 2016-cı il tarixindən etibarən Fonda üzv banklarda qəbul edilən əmanətlər illik faiz dərəcəsi xarici valyuta üzrə 3 faiz və milli valyuta üzrə 15 faiz olmaqla 3 (üç) il müddətində tam sığortalanır.
Sığortalanmış əmanət nədir?
Əmanətin (bank hesabında olan vəsaitin) elə bir hissəsidir ki, əmanətçiyə xidmət göstərən iştirakçı bankda sığorta hadisəsi baş verdikdə “Əmanətlərin sığortalanması haqqında” Qanunla müəyyən edilmiş məbləğdə Fond tərəfindən kompensasiya olunur.